AGEM, desde o 2007 defendendo os intereses profesionais das empresas galegas do eido da música en vivo

Quen somos:

A Asociación Galega de Empresas Musicais (AGEM) naceu en 2007 para defender os intereses profesionais das empresas galegas vinculadas á
música ao vivo: produtoras, promotoras, managers, axentes de contratación, compañías de representación artística, editoras fonográficas e empresas técnicas, entre outras actividades relacionadas coa xestión cultural e os espectáculos.

Cronoloxía de fitos:

  • 2010 — Convenio colectivo pioneiro. Impulsamos o primeiro Convenio Colectivo de Eventos, Servizos e Producións Culturais de Galicia e
    participamos activamente nas revisións posteriores.
  • 2017 — Marco legal do sector. A través da nosa Presidencia participamos na Comisión de Espectáculos e Actividades Recreativas de Galicia, órgano consultivo creado pola Lei 10/2017; colaboramos no desenvolvemento da normativa.
  • 2018 — Seguridade e saúde laboral. En colaboración co ISSGA, elaboráronse materiais de prevención de riscos para montaxe e desmontaxe de escenarios e protección auditiva no sector.
  • 2022 — Ecosistema turismo-cultura. AGEM incorpórase ao Clúster de Turismo de Galicia, reforzando as sinerxías entre música, cultura e turismo.
  • 2024 — Informe económico do sector. Publicamos, xunto ao grupo POSMARK (USC) e co apoio de AGADIC, o estudo _Impacto da industria musical de Galicia: tendencias, retos e oportunidades_: 227,7 M€ de impacto e 3.250 empregos equivalentes a tempo completo (datos 2022).
  • 2024–2025 — Plan estratéxico e premios. Co impulso da Xunta asinamos o primeiro Plan Estratéxico da Industria Musical de Galicia e poñemos en marcha os primeiros Premios da Industria Musical de Galicia.

Principios Fundacionais:

A Asociación Galega de Empresas Musicais (AGEM) constituíuse con estes principios fundamentais:

  • Representación e defensa: representar a todos os asociados, velar polos seus intereses económicos e promover os seus dereitos profesionais, laborais, sociais e culturais, tanto a nivel individual como colectivo.
  • Espazo de encontro: crear un panel estable para o intercambio de ideas e experiencias que favoreza a promoción, produción e distribución de concertos musicais.
  • Solidariedade profesional: fomentar a cooperación entre promotores, produtores e axentes distribuidores, preservando os valores éticos e
  • profesionais comúns.
  • Colaboración interasociativa: manter relacións con outras organizacións afíns, dentro e fóra de Galicia, para a cooperación mutua e o intercambio de boas prácticas. Neste marco, AGEM promove a federación con outras entidades da cadea de valor da música co fin de defender intereses comúns.
  • Diálogo institucional: negociar e establecer acordos con institucións, administracións públicas, empresas e persoas, en calquera ámbito territorial, sobre cuestións que afecten ao desenvolvemento das actividades do sector.

Estrutura:

A Asociación Galega de Empresas Musicais componse dos seguintes Órganos:

  • A Asemblea Xeral: é o Órgano soberano da Asociación e esta composto por todos os membros asociados.
  • A Xunta Directiva: está composta por 3 membros, os cales están facultados para acordar e representar a Asociación en todos os actos específicos que constitúan el obxecto social de dita Asociación Profesional.

 A Xunta Directiva actualmente vixente da Asociación Galega de Empresas Musicais:

  • Presidenta:  Patricia  Hermida Lago de DOTBEAT S.C
  • Secretario: Angel Dieste Aboy   de MENKEEPER NORTE S.L.
  • Tesoureiro: Jose Luís Carballo Lois, de ERNIE PRODUCCIONES SL
  • Xerencia: Beatriz Fernández Rivera.

Misión:

A Asociación Galega de Empresas Musicais (AGEM) ten como misión:

  • Representar ás empresas que conforman a cadea de valor da actividade musical e cultural en Galicia.
  • Promover e defender os intereses empresariais do sector musical en xeral e dos asociados en particular.
  • Prestixiar o labor social das empresas que integran a cadea de valor dos eventos musicais e culturais.
  • Influír e promover consensos entre institucións e axentes sociais a favor do progreso económico e cultural.
  • Reivindicar o valor social das empresas musicais e culturais.
  • Fomentar a música e a cultura, defendendo a súa difusión como garantía de benestar económico e social.

Visión:

Ser un referente do progreso e da prosperidade en Galicia, contribuíndo á mellora económica, social e cultural da sociedade.
Entendemos a música como un catalizador de talento, un motor de actividade económica e un xerador de proxectos creativos con impacto positivo.

Valores:

  • Unión. Cremos no valor do asociacionismo empresarial e no progreso social compartido.
  • Responsabilidade social. Apostamos pola mellora lexislativa e normativa do sector, implementando protocolos de seguridade e benestar para persoas, instalacións e equipos humanos.
  • Eficacia, profesionalismo e especialización. A nosa garantía de calidade.
  • Identidade. Valoramos o feito cultural que nos define como comunidade e contribuímos a achegar Galicia á diversidade cultural do mundo.