O Plan Estratéxico da Industria Musical de Galicia 2030 xa é unha realidade

En AGEM damos un paso importante para o futuro da música galega coa presentación do Plan Estratéxico da Industria Musical de Galicia 2O vindeiro xoves 18 de xuño, ás 12:00 horas, presentamos na Sala Capitol de Santiago de Compostela o Plan Estratéxico da Industria Musical de Galicia 2030, xunto coa Consellería de Cultura, Lingua e Xuventude.

Durante o acto daremos a coñecer este documento, chamado a marcar a folla de ruta para o desenvolvemento, fortalecemento e vertebración do sector musical galego durante os próximos anos.

A presentación contará coa participación de Ángel Dieste, secretario de AGEM; Isabel Neira, membro do equipo da Universidade de Santiago de Compostela responsable da elaboración do Plan; Patricia Hermida, presidenta de AGEM; e José López Campos, conselleiro de Cultura, Lingua e Xuventude.

Ao longo da xornada abordaranse o proceso de elaboración do documento, a diagnose realizada, os principais retos do sector, os cinco eixes prioritarios do Plan, os Plans Directores para a súa implementación e as medidas tractoras previstas para trasladar os seus obxectivos á acción.

O Plan nace dun amplo proceso participativo impulsado por AGEM e desenvolvido pola Universidade de Santiago de Compostela, no que tomaron parte profesionais, empresas, entidades, asociacións e axentes representativos de toda a cadea de valor da música en Galicia.

O resultado é unha estratexia compartida que identifica os principais retos do sector e define as prioridades de actuación para consolidar unha industria musical máis profesionalizada, sostible, conectada e competitiva.

Ao remate do acto celebrarase un espazo informal de encontro e intercambio entre as persoas asistentes, acompañado dun aperitivo e coa ambientación musical de Kris K DJ.